I ei pressemelding frå politiet går det fram at Møre og Romsdal politidistrikt og Vest politidistrikt no samordnar etterforskinga etter at det er registrert tjuveri av 12 båtmotorar i perioden 26. mai til 29. mai. Motorane er stolne i Selje, Volda, Gloppen og Sogndal, og har ein verdi på fleire hundre tusen kroner.
«Det kan sjå ut som at tjuvane fleire stadar har stole ein båt og brukt denne til å frakte tjuvegods frå naustet eller båten dei har stole ifrå», skriv politiet i pressemeldinga.
Dei to politidistrikta meiner det kan vere ein samanheng mellom tjuveria den siste tida. Både i Gloppen og Sogndal har det blitt gjort observasjonar av ein mørk Volkswagen Caravelle med sykkelstativ bakpå.
«Den har truleg utanlandske kjennemerke med tre bokstavar og tre tal», skriv politiet vidare.
Dei ønskjer no tips frå personar som kan ha observert bilen, eller som kan ha informasjon som kan knytast til bilen eller tjuveria, og ber publikum om å ta kontakt på tlf. 02800.