Får 18,5 millionar færre utviklingskroner

– Dette vil svekkje naudsynt omstilling og nyskaping i Møre og Romsdal, skriv fylkesordførar Jon Aasen (Ap) i eit brev til kommunal- og moderniseringsminister Jan Tore Sanner.

Fylkesordførar Jon Aasen (Ap) reagerer på at det blir foreslått å redusere potten for regionale utviklingsmidlar med 18,5 millionar kroner for 2017. Foto: Arkiv.

Fylkestinget reagerer kraftig på at tildelinga av regionale utviklingsmidlar til Møre og Romsdal kan bli redusert med 18,5 millionar for 2017.

I framlegg til Statsbudsjett for 2017 er Møre og Romsdal tildelt 59 millionar kroner i regionale utviklingsmidlar. Det er eit kutt på 18,5 millionar kroner, ein nedgang på 24 prosent, i høve til 2016. Sidan 2013 er tildelinga av regionale utviklingsmidlar til Møre og Romsdal meir enn halvert.

Dette har fått fleirtalet på fylkestinget til å reagere.

- Forslaget kan få dramatiske verknader for naudsynt omstilling og utvikling av næringsliv og lokalsamfunn i Møre og Romsdal, åtvarar fylkesordførar Jon Aasen, - næringsklynger og innovasjonsmiljø kan bli svekka, satsing på tettstadutvikling redusert, og færre gründerar kan få støtte.