Regnbygene låg tette over Fosnavåg og Almenningskaia då reiar Åge Remøy kom ned leideren på "Rem Arctic" under ein stor paraply. Ved sida av seg Han heldt eit godt og vernande tak rundt barnebarnet, 10,5 år gamle Sara Remøy, gudmor for "Rem Arctic".
Dagen før, onsdag, fylte reiaren 65 år, og han har uttalt at det i ein periode framover vil bli kontrahert få skip i Rem.
At konsernsjefen i Kleven meiner samarbeidet har vore eventyrleg, er ikkje så rart. Sidan 2006 har Rem tinga heile 18 skip hos Kleven.
Veret gjorde at namngjevingsseremonien måtte gå kjapt, men konsernsjefen visste å servere gode poeng.
- Etter dårleg ver, kjem det finare ver
- Vi har gledd oss til denne dagen. På same måten som marknaden akkurat no, er veret ikkje heilt slik det bør vere under ein skipsdåp. Men vi veit alle at det etter dårleg ver kjem finare ver. Og vi veit også at marknaden kjem til å bli betre, sa Rasmussen.
Den unge gudmora ønskte skipet hell og lykke, og deisa champagneflaska mot skutesida så det small i både glas og edle dropar.
Deretter nærast sprang dåpsgjestene om bord i skipet.
Om det ikkje blir fleire Rem-dåpar på ei stund, har Kleven andre dåpar i sikte. Konsernet har framleis 10-12 skip i ordreboka si.