SJÅ OGSÅ: Bileteserie frå Sjøborg og fotoshoot

Sjøholt-mannen er Elvis Tribute Artist, og han er nok ein av dei aller beste her til lands. Stemma er så lik Elvis at det nesten er nifst, og likskapen i utsjånad og attitude på scena er slåande. Alt er innstudert til minste detalj. Også Elvis-kostyma til Lid kjem frå autoriserte produsentar på området, og slike autentiske detaljar er med på å krydre opplevinga for publikum.

Som nemnt, stemma er Bjørn Lids viktigaste attributt, og den blei avgjerande for at konsertopplevinga blei så flott. Lid held gjerne att undervegs og har alltid litt å gå på, slik at han kan toppe det heile når det er tid for det. Kvar låt har sin dramaturgi og Lid si utgåve av idolet sitt er meisterleg; ikkje så mykje meir å seie om den saka.

Skapte magi

Bandet let fantastisk denne magiske Sjøborg-kvelden. Dynamikken og presisjonen når uttrykka blir endra - til dømes frå det vare, skjøre til full trøkk i alle rekkene, og tilbake igjen til at berre nokre få av besetninga ber låten fram - var herleg å følgje med på.

Valet av Elvis-repertoar, valet av Elvis frå Sjøholt, utplukk av låtar og valet av arrangement på desse; og ikkje minst, arbeidet med å få dei ulike nummera - 28 i talet - til "å låte som dei skal", har sjølvsagt vore enormt. Erfaringa til Odd Fossum - som dirigerer dei glade og lydhøyre musikantane - har truleg vore den avgjerande faktoren for å få dette prosjektet opp på det høge nivået som dei frammøtte fekk oppleve i Sjøborg fredag kveld. For dette var magisk!

Hovudmennene strålte

Konserten sat som ei kule. Om ikkje alt klaffa 100 prosent på den dramaturgiske gjennomføringa i høve til planen til aktørane, så var det ingen som kunne merke dette av oss som sat i salen.

Regissør Dagfinn Olav Bye noterte eit par manglar i så måte, men uttalte at han var strålande fornøgd med konserten og show-delen av denne:

- Eg synest det gjekk veldig bra. Alle gjorde jobben sin; då må vi også nemne lyd og lys. Storbandet let som det skulle, samspelt og tight. Koret backa opp bandet på ein fin måte. Bjørn Lid gjorde ein kjempejobb som Elvis.

- Eg er veldig glad for at det gjekk så bra. Stemma heldt heldigvis gjennom heile konserten, kommenterer Bjørn Lid, som var takksam for den varme mottakinga frå Sjøborg-publikummet.

Dirigent Fossum strålte også frå øyre til øyre:

- Det er nesten umuleg å gjennomføre ein konsert som dette utan at det snik seg ein liten glipp her og der. Men dei få gongane det skjedde, så henta dei seg meisterleg inn. Og det er ikkje sikkert at publikum merka det heller. Responsen frå dei frammøtte var jo berre fantastisk.