– Det er sjølvsagt veldig kjekt å sjå att det ein har gjort, i ein slik type setting, seier Per Eide til Vikebladet Vestposten.
Fotografen var nyleg om bord i Tyrkia-bygde Havila Pollux same dag som kystruteskipet for første gong skulle gå med passasjerar frå hamn i Bergen på veg nordover til Kirkenes. Der fekk han med eigne auge sjå bilda han har levert. Dette er det siste i rekkja av mange utsmykkingsoppdrag han har hatt for ulike reiarlag opp gjennom åra. Men, det som gjer det ekstra spesielt – er at det er hans klart største.
– Eg har levert 25 motiv til kvart av skipa, som er trykt opp i fleire storleikar og eksemplar og som heng inne på lugarar av ulike typar. 254 bilde på kvart av skipa, 508 totalt. Det blir nok ein «once in a lifetime», dette – men det er veldig kjekt, fortel Eide.
Som også til dømes har hatt utsmykkingsoppdrag på mange av Island Offshore sine båtar opp gjennom åra, og Hurtigruten-skipa Polarlys og Finnmarkingen – som begge blei bygde og levert frå Ulsteinvik, i høvesvis 1995 og 2002. Eide har passande nok også levert undervassbilde til permanent utsmykking av Ingebrigt Davik-huset i Brattvåg. Davik er mest kjent for å ha skrive historiene om «Taremareby».
– Får vise fram norskekysten
I prosessen som leia opp til leveransen, ein prosess som tok rundt to år – hadde han mange forslag til motiv Havila Kystruten kunne velje mellom. Motiva dei beit seg mest merke i var dei Per Eide er desidert mest kjent for – slåande flotte bilde frå verda under havoverflata. Dei fleste bilda er ifølgje Eide tatt i havet på Søre Sunnmøre.
– Dei som reiser med desse flotte skipa ser jo det som rører seg over havoverflata, men ingenting av det som skjer under. Det er ein artsrikdom under havskorpa rundt oss som svært få eigentleg kjenner så godt til. På denne måten håper eg gjestane får litt innsikt i kva som faktisk lever der, seier Eide til lokalavisa og viser fram eit bilde tatt eit stykke utanfor Roppesanden på Flø.
Det er Reklameprint AS i Ålesund som har printa bilda, på børsta aluminiumsplater. Desse har så blitt montert av eit Bergensbasert firma.
Svært erfaren undervassfotograf
69-åringen har vore profesjonell fotograf sidan 1981, og fekk tidleg ei interessere for det som finst under vassoverflata. Han har gjennomført meir enn 2.000 dykk, og dokumentasjonen han har stått for av det som ligg under vasskorpa er enorm. Han er fire gonger norsk meister i undervassfotografering, fem gonger nordisk meister og har ein svært imponerande fjerdeplass frå eitt av dei tre verdsmeisterskapa han har deltatt i. I tillegg har han fleire gonger vore dommar i verdsmeisterskapet.
– Eg har samla ein del erfaring i løpet av mine 42 år som fotograf, og har bygd meg opp ein bra utstyrspark og kunnskapsbase på desse åra. Eg er framleis godt motivert, og ser heile tida etter måtar å fornye meg på, seier Eide.
Han fortel at han også framleis leverer ein del bilde til privathushaldningar og bedrifter.
– Men, dei av bilda mine som er trykt opp flest gonger er dei tre eg leverte til Posten, til dei første valørlause frimerka som kom. Dei er trykt opp i over 82 millionar eksemplar til saman, seier ein smilande Per Eide avslutningsvis.