Marius Hagen trente med Hødd så langt tilbake som desember 2013. Den gongen vart det ikkje nokon overgang til Hødd, og i staden enda Hagen i Nest-Sotra. Sidan den gong har midtbanespelaren også spelt i Kristiansund, HamKam og Åsane, i tillegg til ein tur innom svenske Husqvarna FF, før han i 2017 gjekk til Elverum, der han var lagkamerat med Robin Hjelmeseth i vår.
I haust har Hagen på ny trent med Hødd og no skal 25-åringen vere klar for tre år i blåkvitt.
Ifølgje Østlendingen (krev innlogging) forlèt nemleg Hagen Elverum og har signert ei toårskontrakt med Hødd. Elverum ønskte å ha med seg Hagen ned i 2.-divisjon etter nedrykket i haust, men dette har spelaren takka nei til.
– Eg har hatt eit veldig bra år i Elverum. Det einaste som mangla var å berge plassen, seier Hagen til Østlendingen.
Til avisa seier Hagen at tilbodet frå Elverum ikkje var godt nok.
Marius Hagen spelte 27 kampar for Elverum i 2017. Han noterte seg også for fem scoringar, fire i serien og eitt i cupen.
– Hødd er ein klubb som satsar hardt. Det er viktig for meg. Der eg er i karrieren no, ville eg anten ta det siste steget opp i Eliteserien, eller kome til ein hardtsatsande klubb der eg kjenner mange og veit eg vil trivst, seier Hagen til Østlendingen.
Også Hødd stadfestar at Hagen er klar for klubben. I ei pressemelding frå Hødd seier sportssjef André Nevstad at Hødd meiner Hagen er ein spelar som vil passe godt inn i klubben.
– Marius er ein spelar med mykje erfaring frå OBOS-ligaen, ein god fotballspelar som er tøff i stilen, god i lufta og kan spele både i den djupe rolla, men også i ei offensiv midtbanerolle, seier Nevstad.
Til Hødd seier Hagen: – Eg føler no at eg er komen heim. Eg og sambuaren min gledar oss til å flytte til Ulsteinvik og slå oss til ro her. Og eg har lyst til å bidra til at Hødd rykker opp igjen til OBOS-ligaen neste år.
