IL Hødd Fotball skriv i ei pressemelding at støtteapparatet for a-laget for damer no er klart.
Henrik Breimyr og Torbjørn Rekdal blir nye hovudtrenarar for laget. Ole Per Kragset gir seg etter fleire år.
I tillegg blir Geir Sundal med i trenarteamet. Kalle Strandabø blir også med vidare i arbeidet med damefotballen og Kirsten Nordmo blir med vidare som lagleiar.
- Det betyr at vi får eit team med mykje erfaring og kompetanse, skriv IL Hødd Fotball og melder at det er ei glede å for dei å presentere dette teamet.
Startar opp i januar
Damelaget startar opp med treningar i januar, der skal a-laget og rekrutt-laget trene saman. Etter kvart vil dei plukke ut ein a- og ein rekrutt-stall. Det sportslege målet er at a-laget skal kunne vere med å kjempe om opprykk til andredivisjon, medan rekrutt framleis skal vere ein god utviklingsarena for dei som ikkje er på a-laget.
Flaggskip for Søre Sunnmøre
Utviklingsansvarleg for damefotballen i Hødd, Jesper Törnquist, er også godt nøgd med at teamet er på plass.
- Vi er særs nøgde med teamet vi har fått på plass og arbeider med å byggje ut teamet rundt damefotballen ytterlegare. Vi har som ambisjon å utvikle og heve nivået på alt rundt damefotballen i 2018 og no har vi fått på plass noko av det viktigaste. Damelaget skal vere flaggskip på Søre Sunnmøre i åra framover og skal løfte jente- og damefotballen ytterlegare, kommenterer Törnquist i pressemeldinga.