Pensjon er framtidig lønn, og retten til tenestepensjon er tariffesta for alle i kommunen. Uansett kva for ein leverandør kommunen vel, så har dei tilsette krav på dei gjeldande vilkåra etter tariffavtala, SGS 2020. For sjukepleiarar og lærar er det i tillegg også lovfesta kva for ein leverandør som skal levere deira pensjonsordning.

KLP har i dag det største og mest kompetent miljøet, og leverer god rådgjeving og rettleiing både for tilsette og arbeidsgjevar. KLP er eigd av kommunane, og overskotet går tilbake til kundane. Den andre aktøren på marknaden er organisert som eit aksjeselskap, og det er dermed aksjonærane som får utbytte. Arbeidstakarorganisasjonane er opptatt av at utgifter til pensjon skal være utjamna, og at premiesystemet er kjønns- og aldersnøytralt. Derfor ønsker vi at pensjonsordninga i hovudsak skal forvaltast i store og stabile fellesskap med andre kommunar.

Kvar er det ein tenker at ei mogleg innsparing ligg? Er det eigenkapitalinnskotet? Dette kan ikkje vere frie midlar som kommunen kan omprioritere til drift. Desse midla bør i tilfelle gå inn i kommunen sine fond. Ein må ha ein buffer dersom ein i neste anbodsrunde vel å gå tilbake til KLP. Kommunen har ikkje plikt til å sende pensjon ut på anbod. Dersom ein likevel vel å gjere det, så forpliktar ein seg i framtida til å halde fram med anbodsrunde jamleg.

Dette er ressurskrevjande, både i form av kapital og ekstra arbeid for arbeidsgjevar, tilsette og tillitsvalde. Dersom kommunen skulle gå ut av KLP vil det medføre enda ein leverandør å relatere til for tillitsvalde og arbeidsgjevar. Arbeidsmengda for arbeidsgjevar vil verte større, noko som krev meir ressursar enn det ein har til rådvelde i dag.

Dersom Ulstein kommunestyre trass vår uttale vel å gå ut på anbodsrunde, har vi tillitsvalde innspel til konkurransegrunnlaget. Desse ligg ved sakspapira til kommunestyremøtet 22.06.23. Saka er unnateke offentlegheita?

Helsing

Hilde Ringen Hofseth, Fagforbundet

Hedvig Haakonsholm, Utdanningsforbundet

Marianne Ertesvåg, NSF

Greta Aurvåg, Delta

Arild Støylen, NITO

Anne Hestflått, TEKNA

Elisabeth Myrene, Ergoterapeutene