- Nei, det var kjekt det, svarar ungguten Nils Erik Engen på spørsmål om innhoppet i hans første kamp for Hødds a-lag.
Like etter at Eirik Ulland Andersen skrudde inn 2-0 på overtid, vart ungguten byta inn av trenar Lars Arne Nilsen.
Engen sjølv takkar for at trenaren gav han moglegheita.
- Det er veldig kjekt at dei gir meg tillita slik at eg får prøve meg på eit enda høgare nivå, gliser 16-åringen.
- Spelar kvar som helst
I bakgrunnen høyrer vi rekruttrenar Kenneth Moldskred som snik inn "éi pasning, eitt treff. 100 prosent utteljing".
- Er du letta over at prestasjonane dine i 3.-divisjon har gitt deg sjansen til å ta eitt steg opp, Nils-Erik?
- Det er jo det eg jobbar mot, så endeleg fekk eg debuten min. Det er noko eg har sett veldig fram til, understrekar han.
Les også: Hødd - Ull/Kisa 2-0
Og innhoppet hans har gitt han motivajon til å stå på endå meir framover. Kvar på banen han eventuelt får sjansen spelar inga rolle.
- Eg håpar jo på å få fleire innhopp. Eg likar best å spele sentralt, men eg spelar der dei plasserer meg, seier Engen.
- Så om dei skulle plassere deg som back, så seier du ja?
- Ja, det er heilt i orden. Så lenge eg får spele så er det heilt greitt, hintar han.
Vil inn i laget
Den unge midtbanespelaren håper at debuten hans kan gjere det enklare for han å kome inn i laget på sikt.
- Eg håper at eg kan få vere med å trene vidare med a-laget og kanskje få eit par innhopp til. Ein gong i framtida håper eg at eg kan få spele fast, seier den ambisiøse ungguten.